Bakı Dövlət Universitetinin (BDU) Tələbə Gənclər Təşkilatı ilə BDU-nun İslam Əməkdaşlıq Təşkilatı Modeli (Model of Organization İslamic Cooperation – MOİC) klubunun məlumat sessiyası keçirilib.
Bu barədə AZƏRTAC-a BDU-dan məlumat verilib.
Sessiyada çıxış edən Beynəlxalq münasibətlər və iqtisadiyyat fakültəsinin dekan müavini Kənan Vəkilov BDU ilə İslam Əməkdaşlıq Gənclər Forumu Avrasiya Regional Mərkəzi arasında bu proqram çərçivəsində olan əməkdaşlığı yüksək qiymətləndirib. O, gənclərin beynəlxalq platformalara çıxışı üçün yaradılan şəraitin səmərəliliyindən və imkanlarından söz açıb.
İslam Əməkdaşlıq Gənclər Forumu Avrasiya Regional Mərkəzinin icraçı direktoru Vüsal Qurbanov mərkəzin fəaliyyət istiqamətləri, İslam Əməkdaşlıq Təşkilatı modelinin universitetlərdə öyrənilməsinin effektivliyi və tələbələrin beynəlxalq sistemlə bağlı məlumatlılığının artırılmasındakı rolundan danışıb.
Sonra müzakirələr aparılıb, suallar cavablandırılıb.