Bakı Dövlət Universitetinin (BDU) Sosial elmlər və psixologiya fakültəsinin müəllim və tələbələri fakültənin şəhid məzunu Cavid Manafovun məzarını ziyarət ediblər.
Bu barədə AZƏRTAC-a BDU-dan məlumat verilib.
Sosial elmlər və psixologiya fakültəsinin dekan müavini Nəzakət Kərimova, fakültənin Tələbə Həmkarlar İttifaqının sədri Heydər Aslanov, tələbələr Keşlə Şəhidlər Xiyabanında Cavid Manafovun məzarı önünə gül dəstələri düzüb, xatirəsini ehtiramla yad ediblər.
Sonra şəhid Cavid Manafovun ailə üzvləri ilə görüş olub, qürur mənbəyimiz olan şəhidlərimizin xatirəsinin ürəklərdə əbədi yaşayacağı vurğulanıb.
Qeyd edək ki, Cavid Manafov Vətən müharibəsi zamanı Füzuli, Cəbrayıl, Zəngilan və Qubadlı istiqamətində düşmənə qarşı gedən döyüşlərdə iştirak edib. 2020-ci ilin oktyabrın 31-də batareya komandirini və digər döyüş yoldaşlarını xilas edərkən ağır yaralanıb, noyabrın 7-də şəhid olub.
Cavid Manafov 2016-2020-ci illərdə BDU-nun Sosial elmlər və psixologiya fakültəsində təhsil alıb.