Belarus təcavüzün qarşısını almaq üçün qabaqlayıcı tədbirlərdən istifadə etməyi qanuni hesab edir. Bunu Belarusun müdafiə naziri Viktor Xrenin ÜmumBelarus Xalq Assambleyasında respublikanın hərbi doktrina və təhlükəsizlik konsepsiyasının müzakirəsi zamanı deyib.
“Biz istənilən hərbi münaqişəni siyasətin həyata keçirilməsi vasitəsi kimi qınayırıq və mübahisələrin sülh yolu ilə həlli, dövlətlərin bərabərliyi, daxili işlərə qarışmamaq prinsiplərinə, eyni zamanda, beynəlxalq hüququn hamılıqla tanınmış prinsip və normalarına riayət edirik. Təcavüzün qarşısının alınmasına və ya dəf edilməsinə yönəlmiş qabaqlayıcı tədbirlərin həyata keçirilməsi üçün əlimizdə olan bütün qüvvə və vasitələrdən istifadə etməyi qanuni hesab edirik”.
Xrenin əlavə edib ki, Qərb ölkələrinin təxribatları hərbi münaqişənin başlanması üçün katalizator ola bilər. “Ona görə də onlara ilk növbədə güclü strateji çəkindirmə tədbirləri ilə cavab vermək lazımdır”, – deyə nazir bildirib. (Tass)