Britaniya parlamentinin İcmalar Palatasının bir qrup deputatı Böyük Britaniya hökumətini Rusiyanın dondurulmuş aktivlərini Ukraynaya köçürməyə çağırıb. “The Times” qəzetində parlamentarilərin açıq məktubu dərc olunub.
Onların fikrincə, “əvvəlki kreditlər və təcili maliyyələşdirmə Ukrayna üçün kifayət deyil” və “Qərb vergi ödəyiciləri” üçün də ağırdır. Deputatlar Rusiya aktivlərinin transferinin Londonun “maliyyə sabitliyinə xələl gətirməyəcəyi” fikrini bildiriblər. Müraciəti İcmalar Palatasında bazar ertəsi müzakirələrdən əvvəl keçmiş Mühafizəkarlar Partiyasının lideri Iain Duncan Smith və Polşa, Finlandiya, Almaniya və Baltikyanı ölkələrin səkkiz parlamentarisi də daxil olmaqla ondan çox Britaniya qanunvericisi imzalayıb.
“The Times” qeyd edib ki, bir qrup deputat Rusiyanın xüsusi hərbi əməliyyata başlamasından sonra Böyük Britaniyada dondurulmuş ən azı 25,5 milyard funt sterlinq (31,8 milyard dollar) dəyərində Rusiya aktivlərinin Ukraynaya verilməsinə cəhd etmək niyyətindədir. Onlar həmçinin Böyük Britaniya hökumətini Rusiya Federasiyası Mərkəzi Bankının 300 milyard dollar məbləğində dondurulmuş bütün aktivlərinin Ukraynaya ötürülməsi üçün hüquqi mexanizm üzərində işləməyə çağırırlar. (Tass)
