Amerika hakimiyyət orqanları hələ bu həftənin əvvəlində ABŞ prezidenti Co Baydenin imzaladığı ilə müqayisə oluna biləcək yeni böyük yardım paketləri hazırlamır. Bu barədə cümə axşamı Ağ Evdə ABŞ prezidentinin milli təhlükəsizlik üzrə köməkçisi Ceyk Sallivan bir qrup amerikalı jurnalistə bildirib.
“Belə planlar yoxdur, məncə, bu qanun layihəsini qəbul etmək üçün davamlı səylər fonunda Kiyevə yardım üçün Konqresə əlavə müraciətlər barədə fərziyyələr irəli sürmək və ya proqnozlar verməyə başlamaq tez olardı”.
Sallivanın sözlərinə görə, Birləşmiş Ştatlar artıq qəbul edilmiş paket çərçivəsində yardımın effektiv olmasını təmin etməyə diqqət ayırmağı planlaşdırır. O əlavə edib ki, Ukraynadakı münaqişə zamanı “tamamilə qeyri-xətti bir şey” baş verə bilər ki, bu da “əlavə maliyyələşdirmə qanunlarının” qəbulunu tələb edə bilər. “Amma mən heç bir halda hadisələrin belə inkişaf edəcəyini gözləmirəm, biz bunu qabaqcadan görmürük və planlar qurmuruq, çünki biz hazırkı qanun layihəsini elə planlaşdırmışıq ki, bu, bizə dəstək verməyə imkan verəcək”.
Onun qiymətləndirməsinə görə, Kiyevə ayrılan 61 milyard dollar məbləğində yardım paketi “ən azı bu ilin sonuna qədər” kifayət edəcək. (Tass)