Britaniya və onun Qərb müttəfiqləri, o cümlədən ABŞ, Ukraynanın ciddi artilleriya çatışmazlığını kompensasiya etmək üçün süni intellekt texnologiyası ilə yeni pilotsuz təyyarələr hazırlayır. Bu barədə Bloomberg mənbələrə istinadən məlumat yayıb.
Onların məlumatına görə, bu tip pilotsuz təyyarələrin yaxın aylarda Kiyevə çatdırılması planlaşdırılır, lakin vaxt dəyişə bilər. Agentlik qeyd edir ki, bu təşəbbüs Ukraynada kəskin artilleriya çatışmazlığı ilə bağlıdır və yaxın üç ay ərzində vəziyyət kritikləşə bilər.
Hazırlanan PUA-lar süni intellektlə təchiz ediləcək. Bu texnologiya onların hər birinə nəzarət etmək üçün operatora ehtiyac olmadan, onların bir-biri ilə qarşılıqlı əlaqədə olmasına və avtomatik olaraq obyektə yönəldilməsinə imkan verəcək. Agentliyin mənbələrindən biri xəbər verir ki, onların donanmada yerləşdiriləcəyi planlaşdırılır.
Fevralın 16-da Bloomberg xəbər verib ki, Latviyanın başçılıq etdiyi 10-a yaxın ölkədən ibarət qrup 2025-ci il fevralın 24-dək Ukraynaya 1 milyona yaxın PUA tədarük etmək niyyətindədir. (Tass)