BMT-nin İrqi Ayrı-seçkiliyin Aradan Qaldırılması üzrə Komitəsi Moldovada dövlət orqanlarının rus dilindən istifadə etməkdən imtinası səbəbindən işə qəbul və seçkilərdə iştirak edərkən etnik azlıqların hüquqlarının pozulmasından narahatlığını bildirib. Komitəyə daxil olan müstəqil ekspertlər Moldova hökumətinə ölkə konstitusiyasının müddəalarına uyğun olaraq rus dilinin millətlərarası ünsiyyət vasitəsi kimi istifadəsini təmin etmək üçün tədbirlər görməyi tövsiyə ediblər.
“Komitə etnik azlıq qruplarının üzvlərinin tətbiq edilən məhdudiyyətlər və dövlət orqanlarının rus dilindən istifadə etməkdən imtinası səbəbindən məşğulluqda, seçkilərdə iştirakda, ictimai məlumatlarda və ədalət mühakiməsinə çıxışda ayrı-seçkiliklə üzləşməsi ilə bağlı xəbərlərdən narahatdır.
Ekspertlər Kişinyova xatırladıblar ki, Moldova Konstitusiyasının 13-cü maddəsinə uyğun olaraq rus və digər dillər qorunur, azlıqlara mənsub şəxslərin hüquqları haqqında qanunun 12-ci maddəsi isə “rus dilindən istifadəyə” təminat verir.
Komitə həmçinin “etnik azlıqların öz ana dilində təhsil almaq imkanlarında irəliləyişin olmaması”, o cümlədən müəllimlərin aşağı ixtisas səviyyəsi və ana dilində olan məktəblərə kifayət qədər vəsait ayrılmaması barədə məlumatlardan narahat olub. (Tass)