BMT-nin baş katibi Antonio Quterreş Fələstinlə bağlı Qahirə Sülh Sammitində çıxışı zamanı Qəzza zolağında dərhal atəşkəsə və girovların azad edilməsinə çağırıb.
“Mən atəşkəsə və girovların azad edilməsinə çağırıram” deyib baş katib. O vurğulayıb ki, “qanın dayandırılması və iki dövlətli həllə nail olmaq üçün hər cür səy göstərilməlidir”.
“Beynəlxalq humanitar hüququ tətbiq etmək və Qəzza zolağının mülki əhalisini qorumaq lazımdır”, – Quterreş bildirib. O, “mülki əhaliyə, evlərə və xəstəxanalara hücumlara” son qoymağa çağırıb. BMT-nin baş katibi vurğulayıb ki, Qəzzaya humanitar yardım davamlı olaraq göstərilməlidir.
Fələstin-İsrail münaqişəsinin həlli və Qəzza zolağında gərginliyin azaldılması yollarının müzakirəsinə həsr olunmuş Qahirə Sülh Sammiti prezident Əbdülfəttah əs-Sisinin təşəbbüsü ilə şənbə günü Misirin inzibati paytaxtı Yeni Qahirədə açılıb. Konfransda 34 ölkənin və üç beynəlxalq təşkilatın – BMT, Ərəb Dövlətləri Liqası və Afrika İttifaqının nümayəndələri iştirak edir. Rusiyanı sammitdə Rusiya Federasiyası xarici işlər nazirinin müavini, prezidentin Yaxın Şərq və Afrika ölkələri üzrə nümayəndəsi Mixail Boqdanov təmsil edir. (Tass)
