BMT Təhlükəsizlik Şurası Rusiya və Çinin İranın nüvə proqramı üzrə Birgə Hərtərəfli Fəaliyyət Planına dəstək olaraq qəbul edilmiş 2231 saylı qətnamənin qüvvədə olma müddətinin uzadılmasına dair qətnamə layihəsinə baxılması və bu layihənin səsverməsi üçün hələlik konkret tarix təyin etməyib. Bunu Koreya Respublikasının BMT-dəki müvəqqəti işlər vəkili Kim Sanq-jin deyib.
“Hazırda bu qətnamə layihəsinə baxılması üçün konkret tarix müəyyən edilməyib”, – o, sentyabrda ölkəsinin dünya qurumunun Təhlükəsizlik Şurasına sədrlik etməsi münasibətilə keçirilən mətbuat konfransında deyib.
Bundan əvvəl Rusiya və Çin Təhlükəsizlik Şurasında 2231 saylı qətnamənin 2026-cı il aprelin 18-dək uzadılmasını təklif edən qətnamə layihəsini yaymışdılar. (Tass)