Rusiya prezidentinin Yaxın Şərq və Afrika üzrə xüsusi nümayəndəsi, Rusiya Federasiyası xarici işlər nazirinin müavini Mixail Boqdanov İsveçrənin Moskvadakı səfiri Kristina Marti Lanq ilə Fələstin-İsrail münaqişəsi zonasında və Suriyadakı vəziyyəti müzakirə edib. Bu barədə Rusiya diplomatik missiyasının bəyanatında deyilir.
“Söhbət zamanı Suriya ətrafında və Fələstin-İsrail münaqişəsi zonasında vəziyyətin inkişafı vurğulanmaqla Yaxın Şərq problemlərinə dair ətraflı fikir mübadiləsi aparılıb”, – nazirlik İsveçrə səfiri ilə görüşün yekunlarına dair bildirib.
Bundan əlavə, Boqdanov Misirin Moskvadakı səfiri Nazih Nagari ilə söhbət edib, söhbət zamanı Fələstin-İsrail münaqişəsi zonasında, Suriya və Liviyadakı vəziyyət də müzakirə olunub. “Çoxşaxəli Rusiya-Misir əməkdaşlığının bəzi praktiki məsələləri, o cümlədən qarşıdan gələn ikitərəfli təmasların cədvəli müzakirə edilib”, – deyə Rusiya XİN yekunlaşdırıb.