İranın nüvə proqramı raket və bomba zərbələri ilə tamamilə məhv edilə bilməz; vəziyyət diplomatik yolla həllini tələb edir. Bunu Britaniya parlamentinin İcmalar Palatasında (aşağı palata) çıxışı zamanı Böyük Britaniyanın xarici işlər naziri Devid Lammi deyib.
“Biz Amerikanın zərbələrinin İranın nüvə proqramını nə qədər geridə qoyduğunu hələ dəqiq bilmirik, lakin sülh yolu ilə diplomatik həll yolu hələ də qalır. Zərbələr İranın bir neçə onilliklər ərzində əldə etdiyi biliyi və ya rejimin nüvə silahı yaratmaq ambisiyalarını məhv edə bilməz. Buna görə də biz İranla yeni razılaşma əldə etmək üçün yeni Amerika administrasiyası ilə sıx əməkdaşlıq edirik”, – o deyib.
Xarici işlər naziri qeyd edib ki, bazar günü İranın xarici işlər naziri Abbas Əraqçi ilə telefon danışığı olub. “Mənim Tehrana mesajım budur: təklifi qəbul edin, uranın zənginləşdirilməsindən imtina edin və ABŞ-la ciddi danışıqlar aparın. Alternativ daha da dağıdıcıdır – gözlənilməz nəticələri olan böyük münaqişə”, – Lammi deyib.
O əlavə edib ki, Hörmüz boğazının mümkün blokadası böhranın “diplomatik həllini çətinləşdirəcək” və İran iqtisadiyyatı üçün “öz-özünə işgəncə aktı” olacaq. Britaniyalı nazir vurğulayıb ki, münaqişə genişlənərsə, London Yaxın Şərqdəki bazalarda yerləşdirilmiş “qoşunlarını qorumağa” və “müttəfiqlərə və tərəfdaşlara” yardım göstərməyə hazırdır.