Bakı Slavyan Universitetinin (BSU) rektoru Anar Nağıyevin təşəbbüsü ilə Naxçıvan şəhər Heydər Əliyev adına tam orta məktəbin IX sinif şagirdi Fərid Nəzərli BSU-da keçirilən elmi seminarda iştirak edib.
BSU-dan AZƏRTAC-a bildirilib ki, bu təşəbbüs “Konstitusiya və Suverenlik İli” çərçivəsində martın 5-də BSU-da “Yeni dövrün Azərbaycanı” mövzusunda şagirdlərlə keçirilmiş görüş zamanı yaranıb. Görüşdə çıxış edən Fərid Nəzərli türkoloji tədqiqatlara xüsusi maraq göstərdiyini bildirərək bu sahədə mütəxəssislərlə elmi müzakirələr aparmaq arzusunu ifadə edib. Onun bu elmi marağı BSU rəhbərliyi tərəfindən yüksək qiymətləndirilib və Fərid universitetə dəvət olunub.
BSU-da Fərid Nəzərlinin marağını təşviq etmək məqsədilə “Qədim türk əlifbası və ədəbi dili” mövzusunda elmi seminar keçirilib. Seminar zamanı gənc tədqiqatçı kimi çıxış edən Fərid qədim türk dili və əlifbası ilə bağlı mütəxəssislərə maraqlı suallar ünvanlayıb və seminarın elmi məzmununa töhfə verib. Onun fəallığı və elmi marağı seminar iştirakçıları tərəfindən rəğbətlə qarşılanıb.
Qeyd edək ki, Fərid, eyni zamanda, BSU-nun “Konstitusiya və Suverenlik İli” tədbirlər planı çərçivəsində keçirilən “Yeni dövrün gəncliyi” mövzusunda I Respublika tələbə-şagird elmi-praktik konfransında iştirak edib və panel müzakirələri zamanı çıxış edən iştirakçılardan biri olub.