Cənubi Afrika Respublikası Ukraynadakı münaqişədən narahatdır və onun tezliklə diplomatik yollarla həllinin tərəfdarıdır. Bu barədə Cənubi Afrikanın xarici işlər və əməkdaşlıq naziri Naledi Pandor Afrika ölkəsinə səfər edən Ukraynanın xarici işlər naziri Dmitri Kuleba ilə danışıqların əvvəlində bildirib.
“Cənubi Afrika Ukraynadakı böhrandan və onun gətirdiyi iztirablardan narahatdır. Biz böhranın BMT Nizamnaməsi əsasında diplomatiya və danışıqlar yolu ilə tez bir zamanda həllinin tərəfdarıyıq”.
Pandor bildirib ki, Afrikanın Ukraynada sülh yollarının tapılması təşəbbüsü beynəlxalq ictimaiyyət tərəfindən tələb olunan alət olaraq qalır.
Öz növbəsində Kuleba qeyd edib ki, o, Cənubi Afrika Respublikası ilə əməkdaşlığın inkişaf etdirilməsi istiqamətində keçmişdə itirilmiş vaxtın əvəzini çıxmaq məqsədilə Pretoriyaya gəlib. “Biz bir çox mövzular, o cümlədən Cənubi Afrika Respublikası ilə iqtisadi və mədəni əməkdaşlıq haqqında danışacağıq”, – deyə Ukrayna Xarici İşlər Nazirliyinin rəhbəri bildirib. (Tass)