Cənubi Koreya qitələrarası ballistik raketin buraxılışına cavab olaraq KXDR-in hərbi-siyasi rəhbərliyinin məhv edilməsi üzrə əməliyyatların keçirilməsi üçün xüsusi təyinatlı qüvvələrin təlimlərinin keçirilməsi imkanını nəzərdən keçirir, həmçinin ABŞ-ın strateji aktivlərinin əlavə müvəqqəti yerləşdirilməsi və birgə təlimlərin keçirilməsi ilə bağlı məsləhətləşmələr aparır. Bu barədə ölkənin müdafiə naziri Şin Von Sik MBN telekanalında bildirib.
Onun sözlərinə görə, Cənubi Koreya hakimiyyəti Pxenyana “sonrakı təxribatlardan” çəkinmək üçün xəbərdarlıq kimi iki variantı nəzərdən keçirir. “Baş kəsmə təlimləri haqqında açıq danışmaq çətindir, lakin bu gün Koreya Respublikasındakı Amerika hərbi kontingentinin səhifəsində xüsusi təyinatlıların təlimlər keçirdiyi barədə məlumat dərc edilib”, – nazir belə bir təlimin keçirilməsinin mümkünlüyü ilə bağlı sualı cavablandırıb. Şin Von Sik əlavə edib ki, ABŞ və Koreya Respublikasının xüsusi təyinatlı qüvvələri aviasiya manevrləri və kritik hədəflərə hücumlar həyata keçirir.
Bundan əlavə, o, strateji xarakterli Amerika hərbi texnikasının növbəti dəfə peyda olmasının mümkünlüyünə işarə edib. “Biz yaxın bir neçə gün ərzində strateji aktivlərin yerləşdirilməsi ilə bağlı məsləhətləşmələr aparırıq, həmçinin ABŞ ilə ikitərəfli təlimlər və strateji aktivlərin yerləşdirilməsi ilə bağlı Yaponiya ilə üçtərəfli təlimlər haqqında məsləhətləşmələr aparırıq”, – müdafiə rəisi bildirib. (Tass)