Çinin Ukrayna məsələsində mövqeyi həmişə sülh və danışıqların təşviqi olub. Bunu Avrasiya təhlükəsizliyi üzrə II Minsk Beynəlxalq Konfransında Çin hökumətinin Avrasiya məsələləri üzrə xüsusi nümayəndəsi Li Hui deyib.
“Ukrayna məsələsində Çin həmişə obyektiv və ədalətli mövqe nümayiş etdirib və sülh və danışıqları təşviq etməkdə israr edib”, – Li Hui deyib.
O qeyd edib ki, Çin sədri Si Cinpin Rusiya və Ukrayna da daxil olmaqla bir çox ölkələrin liderləri ilə bu məsələ ilə bağlı dialoqu davam etdirib. Li Hui xatırladıb ki, Çin Ukraynadakı münaqişənin siyasi həlli ilə bağlı mövqeyini əks etdirən sənəd dərc edib, Braziliya ilə birlikdə bu məsələ ilə bağlı altı bəndlik konsensus təqdim edib və “Sülh Dostları” platformasının yaradılması təşəbbüsü ilə çıxış edib.
“Çin hökumətinin Avrasiya məsələləri üzrə xüsusi elçisi kimi mən son bir il ərzində Avropa, Asiya, Afrika və Latın Amerikasına səfər edərək dörd raund şatl diplomatiyası həyata keçirmişəm”, o əlavə edib. (Tass)