Çin hakimiyyəti İran və Birləşmiş Ərəb Əmirliklərinə (BƏƏ) iki Yaxın Şərq ölkəsi arasında Fars körfəzindəki üç ada ilə bağlı mübahisələri sülh yolu ilə həll etməyi təklif edir. Bu barədə Çin Xarici İşlər Nazirliyinin rəsmi nümayəndəsi Mao Ninq bildirib.
“Çinin Fars körfəzindəki üç mübahisəli adalar məsələsində mövqeyi dəyişməz olaraq qalır. Biz müvafiq tərəfləri fikir ayrılıqlarını dialoq və məsləhətləşmələr yolu ilə, sülh yolu ilə həll etməyə çağırırıq”, – o, brifinqdə deyib.
Çin diplomatı xatırladıb ki, bu məsələyə toxunan Çin və BƏƏ-nin bu yaxınlarda dərc edilmiş birgə bəyanatının məzmunu “Çinin mövqeyi ilə üst-üstə düşür”. O, həmçinin vurğulayıb ki, Pekin və Tehran güclü əlaqələr saxlayır və Çin İranla hərtərəfli strateji tərəfdaşlığın inkişafına böyük əhəmiyyət verir. (Tass)