Çinin iki ən böyük nüvə enerjisi şirkətindən biri olan Çin Milli Nüvə Korporasiyası (CNNC) 2024-cü il üçün investisiya büdcəsini artırıb. Bu barədə cümə axşamı Şanxay biznes resursu Itzai Global məlumat yayıb. Resursun əldə etdiyi məlumatlara görə, CNNC 2024-cü ildə investisiyalar üçün 121,6 milyard yuan (16,9 milyard dollar) ayıracaq ki, bu da 2023-cü ildəkindən 52% çoxdur. Vəsaitlər atom elektrik stansiyalarının tikintisinə və enerji ilə bağlı digər layihələrə sərf olunacaq.
Çin Baş Nüvə Enerjisi Korporasiyasına (CGN) gəlincə, onun planlaşdırılan investisiyalarının həcmi 2023-cü il səviyyəsində qalacaq və 60 milyard yuan (təxminən 8,3 milyard dollar) təşkil edəcək. Vəsaitlərin yeni enerji mənbələri ilə bağlı layihələrə yatırılacağı gözlənilir.
Son illər Çin hökuməti ölkədə yeni atom elektrik stansiyalarının tikintisi ilə bağlı layihələri fəal şəkildə təsdiqləyir. 2022-2023-cü illər ərzində 10 yeni atom enerji blokunun tikilməsi qərara alınıb. Ötən ilin sonunda 26 enerji bloku tikilirdi ki, bu da dünyada ən yüksək göstəricidir. Çində ümumilikdə 55 enerji bloku istismara verilib – bu göstəriciyə görə ölkə dünyada üçüncü yerdədir.
(Tass)