Ukrayna, Avropanın Kiyev üçün Vaşinqtondan silah alacağı yeni mexanizm əsasında NATO-ya arzu olunan Amerika silahlarının siyahısını göndərəcək. Bu barədə mənbələrə istinadən CNN telekanalı məlumat yayıb .
Onların məlumatına görə, hazırlanmış sxem çərçivəsində Kiyev alyansa silah və digər texnikanın arzu siyahılarını göndərə biləcək. Amerika tərəfi ABŞ-ın anbarlarında xüsusi silah növlərinin kifayət qədər ehtiyatının olub-olmadığını müəyyənləşdirəcək və sonra siyahıları təşəbbüsdə iştirak etmək istəyən avropalı müttəfiqlərə ötürəcək.
NATO, CNN-in məlumatına görə, Ukrayna üçün ABŞ silahlarının alınması üçün bir növ “bank hesabı” yaradacaq. Mənbələr qeyd ediblər ki, ilkin mərhələdə alyans bu məqsədlə 10 milyard dollar məbləğində vəsait cəlb etmək niyyətindədir.
İyulun 14-də ABŞ prezidenti Donald Tramp Ağ Evdə NATO-nun baş katibi Mark Rutte ilə görüşündə Kiyevə Amerika silahlarının Avropa ölkələri hesabına tədarük edilməsinə dair razılaşmanı açıqlayıb. Alyans “Patriot” sistemlərinin daxil olacağı tədarükləri koordinasiya edəcək və 17 belə sistemin ötürülməsi imkanları nəzərdən keçirilir. Tramp bildirib ki, NATO vasitəsilə Ukraynaya göndəriləcək hərbi yardımın həcmi milyardlarla dollar təşkil edəcək. (Tass)