ABŞ prezidenti Donald Trampın Qrenlandiya ilə bağlı açıqlamalarına Danimarkanın tənqidi səslənib. Bunu krallığın xarici işlər naziri Lars Lokke Rasmussen cümə axşamı NATO-ya üzv ölkələrin xarici işlər nazirlərinin iclasının keçirildiyi Brüsseldə ABŞ dövlət katibi Marko Rubio ilə görüşdən sonra deyib.
Qrenlandiya məsələsi gündəmdə olmasa da, danimarkalı nazir amerikalı həmkarı ilə söhbətində bunu gündəmə gətirməyə bilməyəcəyini bildirib. Danmarks radiosu Rasmussenin sözlərindən sitat gətirir: “Mən fürsətdən istifadə edərək krallıq adından bir neçə şeyi demək istəyirəm, yəni Amerika prezidentinin Qrenlandiyanı ələ keçirmək niyyəti və ya ambisiyasına dair bu daimi bəyanatları heç bir şəkildə davamlı deyil”. “Vəziyyət o həddə çatıb ki, beynəlxalq hüquq normalarına uyğun gəlmir. Məndə elə bir hiss var idi ki, o, mənim dediklərimi diqqətlə dinləyir”.
Danimarka Xarici İşlər Nazirliyinin rəhbəri onu da vurğulayıb ki, Qrenlandiyadan olan nümayəndələr olmadan problemin konkret müzakirəsi mümkün deyil. (Tass)