“Deneyap” laboratoriyasına 80 paytaxt məktəblisi cəlb olunub.
Bu barədə AZƏRTAC-a Bakı Şəhəri üzrə Təhsil İdarəsindən məlumat verilib. Bildirilib ki, məktəblilərə XXI əsr bacarıqlarını əldə etməyə imkan verən “Deneyap” texnologiya laboratoriyasında şagirdlər dizayn və istehsal, robototexnika və kodlaşdırma, aviasiya və kosmik texnologiyalar, nanotexnologiya və materialşünaslıq, süni intellekt, kibertəhlükəsizlik, mobil tətbiq və digər mövzular üzrə ikiillik texnologiya təhsili alırlar.
Qeyd edək ki, layihə əsaslı “Deneyap” texnologiya laboratoriyası gələcək dövrün ehtiyaclarını nəzərə alan, gündəlik həyat problemlərinin həllinə yönələn kompleks və fərqli təhsil modelidir. Laboratoriyada keçirilən təlim proqramları gələcəyin texnologiya istedadlarının yetişməsini dəstəkləyir və ölkəmizin bu istiqamətdə inkişafını hədəfləyir.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və Türkiyə Texnologiya Komandası Fondunun əməkdaşlığı çərçivəsində yaradılan “Bilim Bakı” Mərkəzinin “Deneyap” texnologiya laboratoriyasının təlim proqramlarında 4, 5, 6 və 7-ci sinif şagirdləri iştirak edirlər.