Nəsimi adına Dilçilik İnstitutunda Media və Mülki Cəmiyyət İctimai Birliyinin “Azərbaycan dili və mədəniyyəti: milli və bəşəri dəyərlər” mövzusunda tədbiri keçirilib.
AZƏRTAC xəbər verir ki, tədbirdə çıxış edən institutun direktoru, professor Nadir Məmmədli layihə çərçivəsində keçirilən ictimai müzakirənin əhəmiyyətinə toxunub. Bildirib ki, müasir dövrdə dilin qorunması və təbliğ edilməsi təkcə dilçilərin deyil, bütövlükdə cəmiyyətin üzərinə düşən ortaq məsuliyyətdir. İstər elm və təhsil sahəsi, istər mədəniyyət qurumları, istərsə də ictimaiyyətin fəal üzvləri ana dilimizin təmizliyi və düzgün istifadəsi məsələsində daha məsuliyyətli olmalıdır. Dilçilik İnstitutu bu cür təşəbbüsləri hər zaman dəstəkləyir.
Sonra Media və Mülki Cəmiyyət İctimai Birliyinin sədri Xanoğlan Əhmədov layihə çərçivəsində görüləcək işlərdən danışıb.
Daha sonra institutun Terminologiya şöbəsinin müdiri, professor Sayalı Sadıqova, Hind-Avropa dilləri şöbəsinin müdiri, professor İlham Tahirov və Toponimika şöbəsinin müdiri dosent Elçin İsmayılov məruzələrlə çıxış ediblər. Onlar çıxışlarında dil pozuntuları ilə mübarizə yollarından söz açıblar.
Sonda tədbir iştirakçıları layihənin məqsədini yüksək qiymətləndirərək, belə təşəbbüslərin gələcəkdə də davam etdirilməsinin vacibliyini vurğulayıblar.