Tanınmamış Dnestryanı bölgənin Xarici İşlər Nazirliyinin rəhbəri Vitali İqnatyev Moldovanı münasibətlərin nizamlanması üzrə danışıqlara mane olmaqda ittiham edib.
“Moldova tərəfində biz hələlik siyasi mövzularda ciddi və mənalı dialoqa, nə də sosial və humanitar problemlərin həllinə hazır olduğunu görmürük, əksinə, Kişinyov daim məhdudlaşdırıcı və bloklayıcı üsullarla yeni problemlər yaradır. Halbuki vətəndaşlarımızın müxtəlif sferalarda inkişafı və yaşaması üçün imkanlar var”, – İqnatyev “Rossiya-24 ” telekanalına müsahibəsində bildirib.
XİN rəhbərinin sözlərinə görə, 2024-cü ildə o, Moldovanı danışıqlarda təmsil edən baş nazirin müavini Oleq Serebryanla indiyədək cəmi iki görüşü olub. Bundan əvvəl Moldova nümayəndəsi ATƏT-in Rusiya və Ukrayna ilə birgə vasitəçi kimi çıxış etdiyi “beş üstəgəl iki” danışıqlar formatını qeyri-funksional adlandırmışdı.
Kişinyovla Tiraspol arasında münasibətlər bu ilin əvvəlindən Moldova hakimiyyətinin Dnestryanı əraziyə ölkə ərazisindən gedən mallara rüsum alınması barədə qərarından sonra pisləşib. 2022-ci ildə Ukrayna Moldova ilə sərhədin Dnestryanı hissəsini bağladıqdan sonra mallar Dnestryanı əraziyə yalnız Kişinyovun nəzarət etdiyi ərazilərdən keçə bilər. Tiraspol Kişinyovu Dnestryanı bölgənin zəif mövqeyindən istifadə edərək malların tədarükünü əngəlləməkdə və ona təzyiq göstərməkdə ittiham edib. (Tass)