Agentliyin mətbuat xidmətindən AZƏRTAC-a bildirilib ki, “NEET-in (Not in Education, Employment or Training) qlobal və yerli tendensiyaları” adlı konfrans noyabrın 16-17-də Türkiyənin Antalya şəhərində təşkil olunacaq.
Konfransda Almaniya, Cənubi Koreya, Böyük Britaniya, İsveç, İsveçrə, Niderland, Yaponiya, Bosniya və Herseqovina, Xorvatiya, Latviya, Estoniya və digər ölkələrin yüzdən çox dövlət məşğulluq xidmətlərinin nümayəndələri iştirak edəcək. Eyni zamanda, konfransda Beynəlxalq Əmək Təşkilatının (ILO), İqtisadi Əməkdaşlıq və İnkişaf Təşkilatının (OECD) səlahiyyətli nümayəndələrinin də çıxışı nəzərdə tutulur.
Tədbirin əsas məqsədi təhsildə, işdə və ya təlimdə olmayan gənclərin üzləşdiyi maneələrin aradan qaldırılması məqsədilə beynəlxalq təcrübənin öyrənilməsi, müxtəlif regionlardan olan dövlət məşğulluq xidmətlərinin bu sahə üzrə tətbiq etdikləri qlobal innovativ həllər istiqamətində müzakirələrin aparılmasıdır.
İki gün davam edəcək konfransda agentliyin nümayəndələrinin də bir neçə panel üzrə çıxışı nəzərdə tutulub.
