Qərb ölkələri hərbi xərcləri Soyuq Müharibə səviyyəsinə qədər artırmalı olacaq, NATO-nun tövsiyə etdiyi ÜDM-in 2%-lik aşağı həddi köhnəlib. Bunu Polşa prezidenti Anjey Duda İsveçrənin Davos şəhərində keçirilən Dünya İqtisadi Forumu çərçivəsində CNBC telekanalına müsahibəsində deyib.
“Bu gün istəsək də, istəməsək də, soyuq müharibə dövrünün müdafiə xərcləri siyasətinə qayıtmaq bizim üçün son dərəcə vacibdir”, – Polşa lideri bildirib. Onun sözlərinə görə, 2014-cü ildən NATO üzv ölkələrə ÜDM-in ən azı 2%-ni hərbi xərclərə xərcləməyi tövsiyə edəndən sonra Avropada vəziyyət kökündən dəyişib.
Bundan əlavə, Duda vurğuladı ki, təkcə rəqəmlər Rusiyanı cilovlamaq üçün amil olmayacaq. Qərb ölkələri maliyyədən səmərəli istifadə etməli və müdafiə qabiliyyətini artırmalıdır, deyə o izah edib.
Polşa lideri bir daha bəyan edib ki, Ukrayna üçün təhlükəsizliyin ən yaxşı təminatı onun NATO-ya dəvət olunması olacaq.