Dünya Bankı (DB) Qəzza zolağının zərər çəkmiş əhalisinə əlavə yardım göstərmək üçün 20 milyon dollar ayırmaq qərarına gəlib.
“Dünya Bankı ümumi 35 milyon dollarlıq dəstək paketinin bir hissəsi olaraq Qəzzada zərər çəkmiş insanlara 20 milyon dollarlıq yeni təcili maliyyə yardımı elan edib”, – təşkilatın saytındakı bəyanatda deyilir
Əlavə maliyyələşdirməyə 377 000 nəfərin faydalanacağı ərzaq çekləri və bağlamalar üçün 10 milyon dollar daxildir. Təchizat Birləşmiş Millətlər Təşkilatının Ümumdünya Ərzaq Proqramının köməyi ilə təşkil olunacaq.
Bundan əlavə, Dünya Bankının Səhiyyədə Fövqəladə Hallara Hazırlıq və Cavab Verilməsi üzrə Çox Donorlu Etimad Fondu tibbi yardım və ləvazimatlar üçün Almaniya və Yaponiya tərəfindən ayrılmış 10 milyon ABŞ dolları məbləğində vəsait ayırmışdır. Dəstək BMT-nin Uşaq Fondu və Ümumdünya Səhiyyə Təşkilatı tərəfindən Qəzza zolağının sağlamlıq vəziyyətində fövqəladə hallara reaksiya layihəsi çərçivəsində həyata keçiriləcək. İlkin hesablamalara görə, ayrılan vəsait sayəsində rayon əhalisinin təxminən 10%-i yardım ala biləcək. (Tass)