Rusiya və İran terrorizmlə mübarizədə əməkdaşlığı genişləndirməlidir. Bu fikri TASS-a iranlı politoloq, Rusiya və Qafqaz üzrə ekspert, professor Mehdi Seyf Təbrizi “Krokus Siti Holl”da törədilən terror aktının beynəlxalq təhlükəsizlik vəziyyəti üçün əhəmiyyəti ilə bağlı sualı cavablandırarkən deyib.
“Dəyişən dünya düzəninin sütunlarından biri olan Rusiyanın kollektiv Qərb tərəfindən terror hücumlarının hədəfinə çevrildiyi bir şəraitdə, şübhəsiz ki, İran və Rusiya Federasiyası arasında terrorizmlə mübarizə sahəsində əməkdaşlıq genişlənməlidir”, – ekspert qeyd edib. O əlavə edib ki, iki ölkənin antiterror xidmətləri arasında qarşılıqlı fəaliyyət onların təhlükəsizliyini gücləndirəcək, dünyada və regionda sabitliyə töhfə verəcək. Onun sözlərinə görə, eyni zamanda, Moskva və Tehran “terror təhdidlərinin mənbələrini tam başa düşməlidir”.
Seyf Təbrizinin fikrincə, “bəzi dövlətlər birqütblü dünya nizamına qarşı çıxan ölkələri vurmaq üçün terrorçulardan istifadə edirlər”. Ekspert əlavə edib ki, “ABŞ və onun Qərb müttəfiqləri öz siyasi məqsədlərinə çatmaq üçün ekstremist və terrorçu qruplardan istifadəni dayandırsalar, biz beynəlxalq münasibətlərdə təhlükəsizlik haqqında əminliklə danışa bilərik”.
Mehdi Seyf Təbrizi qeyd edib ki, İranda uzun illərdir terror aktları törədilib, “Lakin bütün bu illər ərzində ölkə terrorçulara qarşı təkbaşına mübarizə aparır”. Onun sözlərinə görə, İslam Respublikası “terrorizmlə mübarizədə unikal təcrübəyə malikdir” və bunu Rusiya ilə bölüşə bilər.
2024-cü il yanvarın 3-də respublika tarixində ən böyük terror aktı baş verib, o zaman Kermanda general Qasım Süleymaninin öldürülməsinin dördüncü ildönümünə həsr olunmuş anım mərasimində törədilən partlayışlar nəticəsində 95 nəfər həlak olub.
(Tass)