ABŞ Daxili Təhlükəsizlik Departamentinin və qurumlarının təxminən 140 əməkdaşı departamentin rəhbəri Alejandro Mayorkasa açıq məktub imzalayıb və onu İsrailin hərbi əməliyyatı ilə əlaqədar Qəzza zolağında böhranın miqyasını susdurmamağa çağırıb. Bu barədə Qətərin “Əl-Cəzirə” telekanalı məlumat yayıb.
Telekanal məktubdan sitat gətirir: “Qəzzada dərin humanitar böhran və İordan çayının qərb sahilindəki şərait nazirliyin adətən müxtəlif yollarla cavab verdiyi hallardır”. “Ancaq indiyə qədər Daxili Təhlükəsizlik Departamentinin rəhbərliyi qaçqın düşərgələrinin, xəstəxanaların, təcili yardım maşınlarının və mülki şəxslərin bombalanmasına məhəl qoymayıb” deyə müəlliflər qeyd edirlər.
“Əl-Cəzirə”nin məlumatına görə, 22 noyabr tarixli sənədi departamentin 139 əməkdaşı və ona üzv olan qurumlar – Gömrük və Sərhəd Mühafizəsi, Federal Fövqəladə Halların İdarə Olunması Agentliyi, İmmiqrasiya və Gömrük Mühafizəsi və ABŞ Vətəndaşlıq və İmmiqrasiya Xidmətləri imzalayıb. Telekanalın vurğuladığı kimi, onların bəziləri təqib olunacağından qorxaraq bunu anonim ediblər.
Sənədin müəllifləri regiondakı vəziyyətin balanslaşdırılmış şəkildə işıqlandırılmasını, habelə böhrandan zərər çəkmiş fələstinlilərə humanitar əsaslarla ABŞ-a daxil olmaq hüququnun verilməsini istəyiblər. (Tass)