Misir prezidenti Əbdülfəttah əs-Sisi amerikalı həmkarı Co Baydenə İsrailin mülki əhaliyə hücumlarının yaratdığı təhlükə və Qəzza zolağında vəziyyətin gərginləşməsi barədə xəbərdarlıq edib. Bu barədə Misir liderinin ofisinin yaydığı bəyanatda deyilir.
Misir prezidentinin sözçüsü Əhməd Fəhmi yazıb: “Misir rəhbəri [Əbdülfəttah əs-Sisi] ABŞ prezidenti Co Bayden ilə söhbəti zamanı həmsöhbətinə Qəzzada hərbi eskalasiyanın daha da artması və mülki şəxslərə hücum təhlükəsi barədə xəbərdarlıq edib. Əl-Sisi vurğulayıb ki, anklavda dərhal atəşkəsə nail olmaq lazımdır, çünki yalnız atəşkəs sektorda vəziyyətin yaxşılaşdırılması üçün lazım olan həcmdə Qəzzaya humanitar yardımın çatdırılmasını təmin edəcək.
Tərəflər həmçinin Misir, Qətər və ABŞ-ın Qəzzada vəziyyəti sabitləşdirmək və fələstinli məhbusların müqabilində israilli girovları azad etmək üçün birgə səylərini müzakirə ediblər. Əl-Sisinin ofisi iddia edir ki, söhbət Amerika tərəfinin təşəbbüsü ilə baş tutub. (Tass)