Azərbaycanın güclənməsi, qüdrətinin artması ölkəyə qarşı məkrli niyyətlərin həyata keçirilməsinin qarşısını alan ciddi sipərə çevrilib.
“Report” xəbər verir ki, bunu Milli Məclis sədrinin birinci müavini Əli Əhmədov oktyabrın 18-də keçirilən parlamentin plenar iclasında çıxışı zamanı deyib.
Onun sözlərinə görə, müasir tarix bir daha dövlət müstəqilliyinin qorunmasının bu gün də öz aktuallığını saxladığını göstərir:
“Müstəqillik bir dəfə əldə edilən aksiyadır, lakin onu qorumaq üçün hər zaman mübarizə aparmaq lazımdır. Prezident İlham Əliyevin müdrik siyasəti nəticəsində əldə etdiyimiz Qarabağ qələbəsi Azərbaycana qarşı müxtəlif uğurları gözü götürməyən qüvvələr tərəfindən təzyiqləri başlatmaq üçün səbəb olub. Azərbaycanın güclənməsi, qüdrətinin artması ölkəyə qarşı məkrli niyyətlərin həyata keçirilməsinin qarşısını alan ciddi sipərə çevrilib”.
Ə.Əhmədov bildirib ki, bu cür təhdid və təzyiqlərin olması Azərbaycan cəmiyyətini daha da bütövləşdirir: “Xalqımız hər zaman dövlət başçısı İlham Əliyevin həyata keçirdiyi siyasəti qətiyyətlə dəstəkləyir. Xalqımızın birliyi əvvəlki dövrlərdən fərqli olaraq daha da güclənib. Azərbaycan sülh siyasətini, proqramını açıq şəkildə bəyan edib. Kimlərinsə xoşuna gəlməsə də, bu siyasət bu gün də uğurla davam edir. Hesab edirəm ki, Prezident İlham Əliyevin apardığı sülh siyasəti bundan sonra da uğur qazanacaq”.