2018-2023-cü illərdə işçilərin əmək hüquqlarının pozulması ilə bağlı həmkarlar ittifaqının hüquq müfəttişləri tərəfindən məhkəmələrə 79 iddia ərizəsi ilə müraciət edilib. Bunlardan 63 iddia tələbi işə bərpa ilə əlaqədar olub, tələblərin hamısı məhkəmələr tərəfindən təmin edilib.
AZƏRTAC xəbər verir ki, bu fikirləri Azərbaycan Həmkarlar İttifaqları Konfederasiyasının (AHİK) sədri, Milli Məclisin deputatı Səttar Möhbalıyev qurumun dekabrın 20-də keçirilən növbədənkənar qurultayında AHİK-in 2018-2023-cü illər üzrə fəaliyyəti ilə bağlı hesabatının təqdimatı zamanı səsləndirib.
Səttar Möhbalıyev bildirib ki, əsas məqsəd işçilər üçün sağlam və təhlükəsiz əmək şəraitinin yaradılması ilə yanaşı, eyni zamanda, bu sahəyə məsul şəxslərin məsuliyyətinin artırılmasıdır.
AHİK sədri diqqətə çatdırıb ki, hesabat ilində həmkarlar ittifaqı üzvlərinin müalicə və istirahətlərinin təşkilinə 154 milyon 658 min manat vəsait xərclənib.
Səttar Möhbalıyevin sözlərinə görə, indiyədək 700 nəfər tələbəyə 300 min manata yaxın adlı təqaüd verilib, 180 nəfərə yaxın tələbənin təhsil haqqı ödənilib.