ABŞ və İsrailin İranın nüvə obyektlərinə hücumları beynəlxalq hüququn, o cümlədən Nüvə Silahlarının Yayılmaması Müqaviləsinin (NPT) və BMT Təhlükəsizlik Şurasının 2231 saylı qətnaməsinin kobud şəkildə pozulmasıdır. Bunu Rio-de-Janeyroda BRICS sammitinin plenar iclasında çıxış edən İranın xarici işlər naziri Abbas Əraqçi deyib.
İranın xarici işlər naziri deyib: “ABŞ və İsrail rejiminin bizim nüvə obyektlərimizə hücumları Nüvə Silahlarının Yayılmaması Müqaviləsi və Təhlükəsizlik Şurasının 2015-ci ildə İranın sülhməramlı nüvə proqramını yekdilliklə təsdiq edən 2231 saylı qətnaməsinin kobud şəkildə pozulmasıdır”.
Onun sözlərinə görə, İslam Respublikasının nüvə proqramı “həmişə müstəsna olaraq dinc xarakterli olub və Beynəlxalq Atom Enerjisi Agentliyinin ən ciddi nəzarəti altında olub”. Nazir həmçinin ABŞ və İsrailin İslam Respublikasının suverenliyinə və dinc nüvə enerjisini inkişaf etdirmək hüququna qarşı yönəlmiş hərəkətlərini pisləyən BRİKS ölkələrinə təşəkkür edib.
O, həmçinin deyib ki, ABŞ və İsrail İrana hücuma görə məsuliyyət daşımalıdır.
Nazir bildirib ki, BMT Nizamnaməsinə əsaslanan dünya nizamı ABŞ və İsrailin İranın nüvə obyektlərinə endirdiyi zərbələr nəticəsində zəifləyib.