Türkiyə prezidenti Rəcəb Tayyib Ərdoğan Avropanın demokratik ölkələrində ifrat sağçı və neonasist hərəkatların fəal olmasını və dövlət himayəsinə keçməsini biabırçılıq adlandırıb. O, bunu Ankarada Beynəlxalq Demokratik İttifaqın təşkil etdiyi seminarın iştirakçıları qarşısında çıxışı zamanı deyib.
“Bu gün türklərə və müsəlmanlara qarşı nifrətdən qaynaqlanan neonasist terrorizmi xalqımızın can və əmlak təhlükəsizliyini təhdid edən səviyyəyə çatıb. Qərb demokratiyaları bu üçün fəlakət, utanc və qalmaqaldır”. Ərdoğanın sözlərinə görə, “Avropada istənilən siyasətçi küncə sıxışdırıldıqda ilk növbədə Türkiyəyə hücum etmək barədə düşünür və bunu söz azadlığı adı altında edir”.
Türkiyə lideri Qərb ölkələrinin Yaxın Şərqdə baş verənlərlə bağlı mövqeyini tənqid edib. “İsrail xəstəxanaları, məscidləri və kilsələri xarabalığa çevirdi, məktəblərə hücum etdi, yemək növbələrindəki insanlara hücum etdi. Kütləvi qətllər etdi. Və bu vəhşiliklər davam edərkən, bir ovuc vicdanlıdan başqa bir ölkə buna qarşı çıxış etmədi. Hətta atəşkəsə çağırmaq əvəzinə onlar diplomatik və hərbi dəstəyi davam etdirdilər”, – Ərdoğan bildirib. (Tass)