Türkiyə prezidenti Rəcəb Tayyib Ərdoğan aprelin 22-də Bağdada səfərindən sonra İraq Kürdüstanı muxtariyyətinin rəhbərliyi ilə Ərbildə danışıqlar aparmaq niyyətində olduğunu təsdiqləyib. Bu barədə o, İstanbulda jurnalistlərə açıqlama verib.
“Bu, bir günlük səfər olacaq. Əvvəlcə Bağdada. Bağdadda İraq prezidenti və baş naziri ilə apardığımız danışıqlardan sonra Ərbilə səfər edəcəyik. Orada Şimali İraq problemlərini müzakirə etmək imkanımız olacaq”- deyib.
Ərdoğan aprelin 16-da Ərbilə səfərin mümkünlüyünü açıqlayıb. O qeyd edib ki, kürd muxtariyyətinin nümayəndələri Bağdada gəlməyəcək, lakin İraq paytaxtında təmaslar bitdikdən sonra Ərbilə səfərin təşkili istiqamətində iş aparılır.
Ümumiyyətlə, İraqa səfər zamanı çoxlu sayda saziş və memorandumun imzalanması gözlənilir. Ümumi çayların su ehtiyatlarının bölüşdürülməsi, neft-qaz sahəsində əməkdaşlıq məsələləri, neft və qazın nəqli mövzusu müzakirə olunacaq. (Tass)