Türkiyə Suriya ilə münasibətləri normallaşdırmaq üçün əlini uzadıb və bunun qonşu ölkədə sülhün bərqərar olmasına töhfə verəcəyinə inanır. Türkiyə lideri Tayyib Ərdoğan suriyalı həmkarı Bəşər Əsədlə şəxsi görüşə ümid etdiyini bildirib.
Noyabrın 12-də BMT-nin İqlim Konvensiyası (COP-29) iclasında iştirak etdiyi Bakıdan qayıdarkən, “Biz Suriya tərəfinə əlimizi uzatdıq, bunun Suriyada sülh və əmin-amanlığın qapısını açacağına inanırıq” deyib. Türkiyə liderinin bəyanatlarını Anadolu agentliyi yayıb.
“Hələ də Əsədə ümidim var. Bir araya gəlib Suriya ilə Türkiyə arasındakı münasibətləri normala döndərə biləcəyimizə də ümidim var. Çünki Suriya ilə Türkiyə arasında terror təşkilatlarını məhv etməliyik. Ədalətli və qalıcı sülh üçün zəmin var. Suriyada bunu təmin etmək üçün atılması lazım olan addımlar da göz qabağındadır”, – Türkiyə prezidenti qeyd edib. “Suriyanın ərazi bütövlüyünü təhdid edən biz deyilik. Suriyanın ərazi bütövlüyü terrorçular, xüsusilə də Kürdüstan Fəhlə Partiyası [Türkiyədə qadağan olunmuş PKK] terror təşkilatı tərəfindən təhdid edilir. Bir çox ölkəyə səpələnmiş suriyalılar bunu dərk etməli və öz ölkələrində yeni ab-hava yaratmaq və ölkələrini qorumaq üçün addımlar atmalıdırlar”, – deyib Ərdoğan.