Ermənistan və ABŞ təhlükəsizlik sahəsində əməkdaşlığı davam etdirəcək, xüsusən də Vaşinqton Ermənistanın müdafiə sektorunda və hüquq-mühafizə sistemində islahatları dəstəkləyəcək. Bu barədə Ermənistan-ABŞ strateji dialoq görüşünün yekun birgə bəyanatında deyilir.
“Birləşmiş Ştatlar Ermənistanın müdafiə sektorunda və hüquq-mühafizə sistemində islahatlara, o cümlədən məsləhətlərin verilməsi və hərbi təhsil proqramlarının həyata keçirilməsi və Kanzas Milli Qvardiyası ilə əməkdaşlıq vasitəsilə dəstəyini davam etdirəcək”, – bəyanatda deyilir.
Sənəddə qeyd olunur ki, tərəflər bütün sahələrdə əməkdaşlığı gücləndirməyə və onun statusunu Strateji Tərəfdaşlıq səviyyəsinə yüksəltməyə sadiqliklərini ifadə ediblər. ABŞ Ermənistanın enerji müstəqilliyi məsələlərində də dəstək vermək niyyətindədir.
“Tərəflər əmin olduqlarını bildiriblər ki, birgə səylərlə Ermənistan və ABŞ arasında əlaqələri dərinləşdirə və regionda sülhün bərqərar olmasına kömək edə biləcəklər”. (Tass)