Ermənistanda Amerika ordusu ilə “Eagle Partner 2025” birgə hərbi təlimlər başlayıb. Bu barədə respublikanın hərbi idarəsinin mətbuat xidməti məlumat yayıb.
Açıqlamada qeyd edildiyi kimi, hərbi təlimlərin açılış mərasimində Ermənistan müdafiə nazirinin birinci müavini, Silahlı Qüvvələrin Baş Qərargah rəisi, general-leytenant Edvard Asryan, ABŞ səfiri Kristina Kuin, yüksək rütbəli hərbçilər və qonaqlar iştirak ediblər.
Təlimlər avqustun 20-dək davam edəcək və Ermənistan Silahlı Qüvvələrinin sülhməramlı briqadasının, ABŞ-ın Avropa və Afrikadakı ordusunun, Kanzas Milli Qvardiyasının hərbçiləri iştirak edəcək.
Ermənistan Müdafiə Nazirliyi qeyd edib ki, təlimlərin əsas məqsədi “sülhməramlı əməliyyatlar çərçivəsində beynəlxalq sülhməramlı missiyalarda iştirak edən bölmələrin əməliyyat uyğunluğu səviyyəsinin artırılması, idarəetmə və taktiki kommunikasiyalar sahəsində qabaqcıl təcrübə mübadiləsinin həyata keçirilməsi, Ermənistan sülhməramlı birləşməsinin döyüş hazırlığının artırılmasıdır”.
Təlimdə həmçinin tibbi evakuasiya prosedurlarına xüsusi diqqət yetirilməklə sülhməramlı missiyaların təlimi və icrası daxildir. (Tass)