Küçə nümayişi zamanı polisləri döyməkdə ittiham edilərək həbs edilən Ermənistanın ikinci prezidenti Robert Köçəryanın oğlu Levon deputat mandatı alıb. Bu barədə qərar respublika Mərkəzi Seçki Komissiyasının (MSK) iclasında qəbul edilib.
“Mərkəzi Seçki Komissiyası bildirir ki, Milli Assambleyanın “Ermənistan” blokunun (parlament – TASS qeydi) mandatını növbəti namizəd Levon Robertoviç Köçəryan alır”, – MSK sədri Vaaqn Hovakimyan bildirib.
Bundan əvvəl “Ermənistan” fraksiyasını təmsil edən həkim Armen Çarçyan deputat mandatından istefa verdiyini, seçki siyahısında ondan sonra gələn daha 4 namizəd də parlamentdə yer almaqdan imtina etdiklərini açıqlamışdı, nəticədə Köçəryanın oğlu bu mandatı ala bilmişdi.
Onun hüquqşünas komandası artıq bəyan edib ki, Levon Köçəryan mandatı aldıqdan sonra deputat toxunulmazlığı alıb və həbsdə qala bilməz. Ermənistanın keçmiş liderinin oğlu sentyabrın 22-də hökumət əleyhinə nümayiş zamanı saxlanılıb və o, dörd polis əməkdaşını döyməkdə ittiham olunur. Özü də bu ittihamları rədd edir. Hüquq qrupu hesab edir ki, həbs Levon Köçəryanın və onun atasının siyasi baxışları ilə bağlıdır. (Tass)