Estoniyada Karyera Təhsil Akademiyasının nəzdində fəaliyyət göstərən Azərbaycan həftəsonu məktəbi Estoniya Təhsil Nazirliyi və Estoniya Milli Azlıqların Həftəsonu Məktəblərin Müəllimləri Assosiasiyasının dəstəyi ilə Pärnu Koidula Dövlət Gimnaziyasında Azərbaycan mədəniyyətini tanıdan dərslər təşkil edib.
AZƏRTAC xəbər verir ki, həftəsonu məktəbinin direktoru Sənəm Əliyeva gimnaziyanın şagird və müəllimlərinə Azərbaycan mədəniyyəti və tarixi, həmçinin Azərbaycan reallıqları barədə məlumat verib.
Gimnaziya ailəsinə, həmçinin Azərbaycan xalça sənəti haqqında danışılıb, milli naxışlar tanıdılıb. Həftəsonu məktəbinin müəllimi Kadir Tanış dinləyicilərə naxışların fəlsəfi mənalarından da söz açıb. Sonra şagirdlər Azərbaycan milli naxışlarını çəkiblər.
Gimnaziyada həm də Azərbaycan tarixi və mədəniyyətini əks etdirən guşə qurulub.
Azərbaycan həftəsonu məktəbi tərəfindən Pärnu Koidula Dövlət Gimnaziyasına Azərbaycanla bağlı ingilis dilində kitablar, xalça maketləri və suvenirlər hədiyyə edilib. Tədbirin sonunda məktəb ailəsi Azərbaycanın milli şirniyyatlarından dadıblar.
