Fələstin Səhiyyə Nazirliyi Qəzza zolağındakı Əl-Şifa xəstəxanasından olan xəstələri İordan çayının qərb sahilindəki tibb müəssisələrinə göndərməyə çalışır. Bu barədə ölkənin Səhiyyə naziri Mey Kayle məlumat verib.
“Biz xəstələri, ilk növbədə yaralıları və yeni doğulmuş körpələri Əl-Şifa tibb kompleksindən İordan çayının qərb sahilindəki xəstəxanalara köçürmək üçün çalışırıq”, – deyə Əl-Qahira Əl-Ekhbariya telekanalı nazirdən sitat gətirib.
Kayle İsrail Müdafiə Qüvvələrinin yaralı və xəstələrin Əl-Şifadan çıxarılması tələbini müharibə cinayəti adlandırıb.
Daha əvvəl bildirilmişdi ki, İsrail ordusu bu tibb kompleksinin boşaldılması üçün bir saat vaxt verib. Əl-Cəzirə telekanalının bildirdiyinə görə , İsrail qüvvələri tibb işçilərinə, xəstələrə və qaçqınlara xəstəxananı tərk etmək üçün bir saat vaxt verib. (Tass)
