Azərbaycan azad edilmiş ərazilərə, xüsusilə Qarabağa Çin investisiyalarının cəlb edilməsində son dərəcə maraqlıdır.
“Report” xəbər verir ki, bu barədə Milli Məclisin deputatı Fariz İsmayılzadə Bakıda keçirilən “Azərbaycan – Çin strateji tərəfdaşlığı: Qlobal Cənubda konsolidasiya və əməkdaşlığın təşviqi” mövzusunda keçirilən konfransda deyib.
F.İsmayılzadə, Azərbaycan və Çin arasında ticari-iqtisadi əlaqələrin sürətlə inkişaf etdiyini xatırladıb, qeyd edib ki, ötən il iki ölkə arasında ticarət dövriyyəsinin dəyəri 3 milyard ABŞ dollarına çataraq rekord həddə yüksəlib: “Bu da əvvəlki ilin göstəricisindən 40 % çoxdur”.
“Xüsusilə sevindirici haldır ki, son bir il ərzində Çin Qırğızıstanı Özbəkistanla və nəticədə Xəzər regionu ilə birləşdirən yeni dəmir yolunun tikintisinə başlayıb. Bu, ölkələr arasında ticarət dövriyyəsinin artmasına kömək edəcək və “Bir kəmər-bir yol” strateji layihəsini gücləndirəcək”, – parlamentari bildirib.
F.İsmayılzadə, həmçinin vurğulayıb ki, Azərbaycan işğaldan azad edilmiş ərazilərə Çin investisiyalarının cəlb edilməsində son dərəcə maraqlıdır: “Çin şirkətləri üçün bütün şərait yaradılacaq, o cümlədən onlar Azərbaycanın dövlət investisiya layihələrində iştirak edə biləcəklər”.