Finlandiya Şimali Atlantika Alyansı və Avropa İttifaqındakı müttəfiqləri ilə Rusiyaya aid edilən GPS naviqasiya sisteminin dayandırılması ilə bağlı əlaqə saxlayır. Bu barədə Finlandiya Nazirlər Kabineti məlumat yayıb.
Finlandiya Nazirlər Kabinetinin məlumatına görə, cümə günü Respublika Prezidenti Aleksandr Stubb və Nazirlər Şurasının Xarici Siyasət və Təhlükəsizlik Komitəsi “Rusiyanın GPS-in işinə müdaxiləsi” iddiasını müzakirə ediblər. “Finlandiya bu məsələ ilə bağlı NATO müttəfiqləri və Aİ tərəfdaşları ilə sıx əlaqə saxlamağa davam edəcək”, – bəyanatda deyilir.
Həmçinin beynəlxalq təlimlər, ABŞ, İsveç, Norveç, Böyük Britaniya və digər əsas müttəfiqlərlə müdafiə sahəsində əməkdaşlığın dərinləşdirilməsi, eləcə də təhlükəsizlik mühitində əhəmiyyətli dəyişikliklər müzakirə edilib. (Tass)
