Almaniya və Fransa yeni MGCS (Əsas Yer Döyüş Sistemi) tankının hazırlanması layihəsinin icrası zamanı tapşırıqların bölüşdürülməsinə dair razılığa gəliblər. Bu layihə 2018-ci ildə təqdim olunub. Bunu Almaniyanın müdafiə naziri Boris Pistorius Fransa Silahlı Qüvvələrinin naziri Sebastyan Lekornu ilə görüşdən sonra deyib.
“Bu gün biz bir irəliləyiş əldə etdik. Bu hadisəni tarixi adlandırmaq mübaliğə olmaz. Biz bu layihə üçün bütün vəzifələrin bölüşdürülməsi ilə bağlı razılığa gəldik – Almaniya nəyi üzərinə götürəcək, Fransa nəyi üzərinə götürəcək, biz birlikdə nə edirik. İkincisi, hasilatın iki ölkə arasında 50% bölünməsi ilə bağlı razılığa gəldik”, – deyə o bildirib. Bu, Pistoriusun aydınlaşdırdığı kimi, mövcud tankların “sadə bir yeniləməsi deyil, tamamilə yeni bir sistem” haqqında olacaq.
Onun sözlərinə görə, müvafiq memorandum aprelin 26-da Parisdə imzalanacaq.
2023-cü ildə “Handelsblatt” qəzeti hökumət və sənaye dairələrindəki öz mənbələrinə istinadən Almaniyanın Fransa ilə birgə hazırladığı yeni tank layihəsinin iflasa uğramaq ərəfəsində olduğunu yazıb. İki ölkənin hökumətləri layihəyə altı il əvvəl başlayıblar. Yeni tank Alman Leopard 2 və Fransız Leclerc-i əvəz etmək və döyüş xüsusiyyətlərinə görə əhəmiyyətli dərəcədə üstün olmaq üçün nəzərdə tutulub.
Layihə Almaniyanın Krauss-Maffei Wegmann, Rheinmetall və Fransanın Nexter Systems şirkətləri tərəfindən həyata keçirilir. Bild qəzetinin yazdığına görə, yeni tankın ekipajı cəmi iki nəfərdən ibarət olacaq. Onun azaldılması (Leopard 2-nin heyəti dörd nəfərdən ibarətdir) avtomobilin avtonom idarə olunmasını təmin etmək istəyi ilə bağlıdır.
MGCS-nin ən azı 130 mm kalibrli silahla təchiz ediləcəyi gözlənilir. Müqayisə üçün qeyd edək ki, Leopard 2-də 120 mm çaplı, Rusiyanın T-14 Armata-da isə 125 mm çaplı silah var. MGCS topunun mərmiləri daha uzun olacaq və daha böyük nüfuz gücünə və sürətinə malik olacağı gözlənilir. APFSDS (zirehdələn qanadlı sabot mərmi) sursatları super güclü volfram ərintisindən hazırlanacaq.
Yeni tankın hibrid mühərrikə sahib olacağı və daha yüngül və daha davamlı zirehlərlə birlikdə daha az yanacaq sərf edəcəyi və yanacaq doldurmadan daha uzun müddət gedə biləcəyi planlaşdırılır.
(Tass)