Fələstinin öz müstəqil dövlətini yaratmaq istəyinə məhəl qoymamaq səhv olardı. Bu fikri Fransanın BMT-dəki daimi nümayəndəsi Nikola de Rivyer CNN telekanalında bildirib .
“Bu böhran həyəcan təbili çalmalıdır. Bizə siyasi həll lazımdır. Düşünürəm ki, Fələstinin dövlət olmaq istəyinə məhəl qoymamaq səhvdir. Fələstinin bu istəyi təmin olunmayana qədər, düşünürəm ki, böhran təkrarlanacaq yenidən”, – diplomat bildirib.
O qeyd edib ki, bu yanaşma Parisin Fələstinin radikal HƏMAS hərəkatı ilə mübarizədə İsrailə verdiyi dəstəyə zidd deyil. “Fransa həmişə İsraili dəstəkləyib. İsrailin təhlükəsizliyinin təmin edilməsi zərurəti müzakirə olunmur. Biz İsrailin özünümüdafiə hüququnu şübhə altına almırıq”, – o əlavə edib.
“İsrailin özünü müdafiə etmək və Qəzzada olan terrorçularla döyüşmək hüququ var. Lakin [İsrailin] Qəzzanın mülki əhalisinə zərər vurmağa haqqı yoxdur” deyə Fransanın dünya təşkilatındakı daimi nümayəndəsi yekunlaşdırıb. (Tass)