Bunu “Report”un Füzuli şəhərinə ezam olunmuş əməkdaşına açıqlamasında Füzuli rayonu Mirzə Uluqbəy adına 1 saylı orta məktəbin direktoru Həcər Mahmudova deyib.

O qeyd edib ki, bu gün Füzulidə insanların sülh içində, rahat yaşaması üçün şəhidlər canlarından keçiblər.

“Ona görə işğaldan azad edilən ərazilərdə yaşamalı, yaratmalı, doğma yurdumuzda kök salmalıyıq”, – Həcər Mahmudova deyib.

Direktor bildirib ki, Füzulidə məktəbə direktor seçilmək onun üçün ən böyük şərəf, uğur və sevinc idi.

“Hal-hazırda kollektivimizdə 39 nəfər işçi var. Hər dəfə Füzuliyə köç edən ailələrin tərkibindən asılı olaraq dəyişəcək. Tədris ilinin sonuna qədər şagirdlərin sayının artım tempinə uyğun olaraq siniflərin sayının artmaq ehtimalı var. Məsələn, bu gün gələn köçdə də müəllimlərimizin gəlmək ehtimalı var”, – direktor qeyd edib.

O təhsil ocağının işğaldan azad edilmiş ərazilərdə fəaliyyətə başlayan ilk məktəblərdən biri olduğunu deyib: “Ona görə buranın bünövrəsi sağlam olmalıdır və bunun üçün də müəllimlərimizlə birgə əlimizdən gələni edəcəyik”.

H.Mahmudova vurğulayıb ki, məktəbin pedoqoji heyəti olaraq şagirdlərin asudə vaxtlarını səmərəli keçimələri üçün çalışırlar: “Bunun üçün onların maraq dairələrinə uyğun olaraq rəsm sərgisi, idman, həmçinin intellektual yarışlar, debatlar, eyni zamanda maarifləndirici görüşlər təşkil edirik”.