“Report”un Qərb bürosunun məlumatına görə, tədbirdə Gəncə şəhər icra hakimiyyətinin başçısı Niyazi Bayramov, Gəncə Şəhər Apellyasiya Məhkəməsinin sədri Toğrul Əli, Gəncə Şəhər Məhkəməsinin sədri Xəqani Tağıyev, Gəncə Şəhər Prokuroru Azad Qarayev, Gəncə Şəhər Baş Polis İdarəsinin rəisi Teymur Hacıyev, 12 saylı Ərazi Vergilər Baş İdarəsinin rəisi Şahin Eyyubov, Dövlət Təhlükəsizliyi Xidməti (DTX) Gəncə şəhər idarəsinin rəisi Rəşad İsrafilzadə və Gəncə Şəhər Baş Polis İdarəsinin şəxsi heyəti iştirak ediblər.

Əvvəlcə tədbir iştirakçıları Ulu Öndər Heydər Əliyevin Gəncənin Baş meydanında ucaldılan abidəsini ziyarət edib, önünə gül dəstələri düzüblər.

Gəncə Şəhər Baş Polis İdarəsində keçirilən toplantıda bildirilib ki, Ümummilli Lider Heydər Əliyevin 1998-ci ildə imzaladığı Fərmanla iyulun 2-si Azərbaycan Polisi Günü elan olunub. Ulu Öndərin 1993-cü il iyunun 15-də hakimiyyətə qayıdışından sonra hüquq-mühafizə orqanlarının işində dönüş yaranıb, mütəşəkkil cinayətkarlığa, korrupsiyaya, terrorizmə, narkotik vasitələrin qanunsuz dövriyyəsinə qarşı mübarizə güclənib.

Ulu Öndərin əsasını qoyduğu siyasəti uğurla davam etdirən Prezident İlham Əliyev Azərbaycan polisinə xüsusi diqqət və qayğı ilə yanaşır. Dövlət başçısı daim Azərbaycan polisinin maddi-texniki təchizatının, sosial təminatının yaxşılaşdırılması üçün müvafiq addımlar atır.

Dövlət başçısının həyata keçirdiyi hərtərəfli islahatlar çərçivəsində daxili işlər orqanlarının müasirləşməsi üçün bütün lazımi tədbirlər görülüb. Bu da polislərin peşəkarlığını, məsuliyyət hissini artırmaqla yanaşı, onlara daha yaxşı xidmət göstərmək üçün əlavə güc verir. Bu gün ölkənin bütün bölgələrində olduğu kimi, Gəncə şəhərində də Azərbaycan polisi daim asayişin keşiyində dayanır, şəhərin kriminogen durumunu tam nəzarətdə saxlayır.

Çıxışlardan sonra Gəncə şəhər icra hakimiyyətinin başçısı Niyazi Bayramovun müvafiq Sərəncamına əsasən, bir qrup polis əməkdaşı 2 İyul – Azərbaycan Polisi Günü münasibətilə “Fəxri fərman”la təltif olunub.

Sonda xatirə şəkli çəkdirilib.