Sumqayıtdakı Gənclər Evində “Gənc İxtiraçılar Laboratoriyası 2.0” layihəsinin təqdimatı olub.
AZƏRTAC xəbər verir ki, Abşeron-Xızı Regional Gənclər və İdman İdarəsinin keçirdiyi tədbirdə çıxış edən layihə rəhbəri Ceyhun Hüseynov ölkəmizdə uğurla həyata keçirilən dövlət-gənclər siyasətindən, Gənclər Fondunun və Sumqayıt Tələbələri İctimai Birliyin fəaliyyətindən danışıb.
Gənclər Fondunun maliyyə dəstəyi ilə reallaşan “Gənc İxtiraçılar Laboratoriyası 2.0” layihəsinin məqsədi İKT mühəndisliyi sahəsində həvəsi olan gənclərdən ibarət laboratoriya yaratmaq, robot texnologiyaları, dizayn, kodlaşdırma sahələrinə maraq oyatmaq, bu sahədə təhsillərini davam etdirmək, gələcəkdə karyera və ixtisas seçimlərində yardım göstərməkdir.
Azərbaycan Respublikası Gənclər Fondunun nümayəndəsi Zaur Osmanov, Gənclərin İnkişafı və Karyerası Mərkəzinin Abşeron-Xızı regional nümayəndəliyinin direktoru Sevinc Qasımova və layihə təlimçisi Ramil Süleymanov çıxışlarında mövzunun aktuallığına toxunaraq, layihənin əhəmiyyətindən danışıblar.
Üç ay müddətinə davam edəcək layihədə, ümumilikdə, 250 nəfər iştirakçı olmaqla, 5 təlimin keçirilməsi nəzərdə tutulub.