Gürcüstan parlamentinin rəhbərliyi genişmiqyaslı anti-hökumət nümayişləri ilə əlaqədar qırmızı təhlükəsizlik səviyyəsinin tətbiqi və bununla da Tiflisdəki qanunvericilik binasını ziyarətçilərin üzünə bağlamaq qərarına gəlib. Bu barədə qanunverici orqanın bəyanatında deyilir.
“Bu gündən, noyabrın 29-dan etibarən parlament binasında qırmızı təhlükəsizlik səviyyəsi tətbiq edilib, qırmızı səviyyə zamanı parlament aparatının rəhbəri tərəfindən müəyyən edilmiş şəxslərdən başqa heç kim Gürcüstan parlamentinə buraxılmayacaq”, – deyə məlumatda bildirilir.
Gürcüstanın baş naziri İrakli Kobaxidze cümə axşamı bildirib ki, hakim “Gürcü Arzusu – Demokratik Gürcüstan” partiyası 2028-ci ilin sonuna qədər Aİ-yə üzvlük danışıqları məsələsini gündəliyə salmamaq və icmanın bütün büdcə qrantlarından imtina etmək qərarına gəlib. Hökumət başçısının sözlərinə görə, buna səbəb üzvlük dialoqunun başlanması ilə bağlı Aİ-nin daimi şantajı, parlamentin qəbul etdiyi bir sıra qanunların ləğv edilməsi tələbləri və Gürcüstan hakimiyyətinə qarşı sanksiyaların tətbiqinə çağırışlar olub. (Tass)