Gürcüstan hakimiyyəti Rusiya rəhbərliyinin nümayəndələri ilə heç bir gizli danışıqlar aparmır. Bunu Rusiya Federasiyasının da iştirak etdiyi “Bir kəmər – bir yol” forumunda Gürcüstan nümayəndə heyətinin iştirakı ilə bağlı parlamentdə çıxışı zamanı baş nazirin müavini, respublikanın iqtisadiyyat və davamlı inkişaf naziri Levan Davitaşvili deyib.
“Bir kəmər – bir yol” forumunda iştirakımıza gəlincə, bu, Gürcüstanla yanaşı, bir çox Aİ ölkələrinin də üzvü olduğu təşəbbüsdür. Gürcüstan yarandığı gündən bu forumda fiziki olaraq iştirak edib və Rusiya Federasiyası da demək olar ki, həmişə orada iştirak edib. Əgər kimsə təsəvvür etmək istəsə ki, bu gün Gürcüstan hakimiyyəti hər hansı formada ölkənin maraqlarına xələl gətirir və cəmiyyətdə yanlış yayılan kimi [Rusiya Federasiyası ilə] hansısa gizli dialoq aparır, mən birmənalı və birbaşa deyə bilərəm – bu belə deyil”, – Davitaşvili bildirib.
Davitaşvili və Rusiya prezidenti Vladimir Putin də daxil olmaqla, bir çox ölkələrin nümayəndə heyətlərinin rəhbərlərinin iştirak etdiyi tədbirdə qala-ziyafətin mediada yayılan görüntülərindən sonra Gürcüstan müxalifəti forumla maraqlanmağa başlayıb. Baş nazirin müavini müxalif Avrooptimistlər qrupu tərəfindən parlamentə çağırılıb. (Tass)