Gürcüstan və Ermənistan hakimiyyəti sərhəddə vahid gömrük nəzarəti modelinin tətbiqi imkanını nəzərdən keçirir. Bunu Ermənistanın baş naziri Nikol Paşinyan Tbilisidə gürcüstanlı həmkarı İrakli Qaribaşvili ilə danışıqlardan sonra keçirilən brifinqdə deyib.
“Hər iki ölkənin gömrük idarələri sərhəd məntəqələrində vahid nəzarət modelinin tətbiqi imkanlarını fəal şəkildə nəzərdən keçirir. Bu halda gömrük prosedurları üçün tələb olunan vaxt əhəmiyyətli dərəcədə azalacaq”, – Paşinyan bildirib.
Hazırda Gürcüstanla Ermənistan arasında avtomobillər və piyadalar üçün üç gömrük keçid məntəqəsi fəaliyyət göstərir: Sadaxlo – Baqrataşen, Ququti – Qoqavan və Ninotsminda – Bavra. (Tass)