Gürcüstanın baş naziri İrakli Kobaxidze vəzifəsinə ilk rəsmi səfəri ilə Bakıya gəlib. Bu barədə Gürcüstan hökumətinin mətbuat xidməti məlumat yayıb.
Mətbuat xidmətinin məlumatına görə, Kobaxidzeni hava limanında Azərbaycanın baş nazirinin müavini Əli Əhmədov qarşılayıb. Kobaxidze ilə Azərbaycan prezidenti İlham Əliyev arasında ikitərəfli görüş planlaşdırılır, bundan sonra liderlər mətbuata bəyanatlarla çıxış edəcəklər. Gürcüstanın baş naziri ilə azərbaycanlı həmkarı Əli Əsədov arasında da görüş nəzərdə tutulub.
Gürcüstan nümayəndə heyətinin tərkibində baş nazirin birinci müavini, iqtisadiyyat naziri Levan Davitaşvili və xarici işlər naziri İlya Darçiaşvili də Bakıya gəliblər.
İrakli Kobaxidze fevralın əvvəlində Gürcüstanın baş naziri postunda İrakli Qaribaşvilini əvəzləyib. Qaribaşvili əvvəllər Kobaxidzenin tutduğu hakim “Gürcü arzusu – Demokratik Gürcüstan” partiyasının sədri postunu tutub. Kobaxidze hökumət başçısı kimi ilk xarici səfərini fevralın 20-21-də Brüsselə edib.
(Tass)